18 June Marathi

अठरा जून 1946. वेळ सकाळचो. बोरये सारकिल्या दनपारच्या बारा वरांचेर लेगीत सुर्याचें दर्शन जावंक पावना अशा घनदाट झाडांच्या आनी कुळागरांच्या सावटा खाला आशिल्ल्या धाकटुल्या गांवांत त्या दिसा सकाळीं फुडेंच कुपांच्या गडगडान ताल धरिल्लो. देवाचे पालखे फुडें नाचतल्या कलवंता भशेन विजेच्या चकचकान लय धरिल्ली. शेतांत व्हडले बेबे खर्जांत आड्डताले. गडगडाचो साद कानार पडना फुडें शेताचे धडेर बिळांतल्यो काळ्यो खडपी कुल्ल्यो पावसाक येवकार दिवपाक भायर आयल्यो. वाजंत्र्यांच्या धोल-ताश्यांच्या संगितान प्रसन्न जाल्लो नवरदेव सोयरो कसो अकस्मात दारांत उबो रावलो. पावसान सगलें वातावरण न्हाणोवन सोडलें. घोग्यांनी पावस पडना फुडें दारांत उदकाचे ल्हान ल्हान व्हाळ बेबकां भशेन उडक्यो मारूंक लागले. त्या व्हाळांनी भुरगीं कागदाचीं व्हडीं सोडपाक लागली.